Op 13 Maart vanjaar het jong boere, rolspelers in die landboubedryf en ondersteuners by Gecko Ridge in Mooiplaats, Pretoria, bymekaar gekom vir TLU SA se Jongboer-konferensie. Met die tema “Boer 2.0: Die nuwe generasie boer” het die dag gefokus op die rol wat jong boere moet speel in die toekoms van landbou.

Deelnemers het reeds vroegoggend begin opdaag waar koffie, tee en kolwyntjies bedien is, terwyl die mini- agri-ekspo ’n geleentheid geskep het vir boere om met rolspelers te skakel en nuwe tegnologie en produkte te verken. Hierdie informele sessie het waardevolle netwerkgeleenthede gebied aan jong boere om idees uit te ruil en nuwe kontakte te maak.

Geroep om ‘verskil te maak’

Die konferensie is amptelik geopen deur die voorsitter van TLU SA se Jongboer-komitee, Clemens Senekal, waarna ds. Leon Lubbe die opening met skriflesing en gebed gelei het.

 

In sy boodskap het hy ’n eenvoudige maar treffende voorbeeld gebruik: ’n pen. Mense gebruik dikwels ’n pen vir alles waarvoor dit nie gemaak is nie – om iets oop te krap of ’n knoppie te druk. Maar wanneer dit uiteindelik gebruik moet word om te skryf, werk dit soms nie meer nie.

“Net soos ’n pen gemaak is om te skryf, het elke jong boer ook ’n doel en ’n roeping om ’n verskil in landbou te maak.”

Sy boodskap was dat elke mens, net soos daardie pen, ’n doel het – en dat jong boere hul roeping moet uitleef waar hulle die grootste verskil kan maak.

Senekal het daarna gepraat oor die belangrikheid van landboustrukture en hoe jong boere hul plek in die groter landboubedryf moet verstaan. Volgens hom lê daar groot waarde in georganiseerde strukture wat boere se stem versterk en samewerking bevorder.

Inspirasie as gesprekspunt

Die dag se program het verder gefokus op persoonlike groei en ontwikkeling. Tiaan Barkhuizen, TLU SA se Jongboer van die Jaar vir 2025, het verduidelik dat die Jongboer-kompetisie nie slegs ’n wedstryd is nie. “Die Jongboer-kompetisie is meer as ’n wedstryd – dit is ’n platform vir groei, blootstelling en nuwe geleenthede.”

Dié kompetisie skep geleenthede vir die uitbreiding van netwerke, blootstelling aan ander landbouers sowel as leierskapontwikkeling – waardevolle ervaring vir jong boere wat hul plek in die bedryf wil vestig.

Regsaspekte was ook deel van die gesprek toe adv. Charles Lloyd praktiese insig gedeel het oor die wetlike werklikhede waarmee boere te kampe kry. In sy praatjie oor allerlei onderwerpe, waaronder kontrakte en verantwoordelikhede, het hy beklemtoon dat kennis van die reg ’n belangrike hulpmiddel vir elke boer is.

 Tegnologie noodsaaklik vir vooruitgang
Die konferensie het ook ’n blik gebied op die toekoms van landbou. ’n Beplande hommeltuig-demonstrasie deur Highveld Drones sou wys hoe tegnologie ’n toenemend belangrike rol speel in moderne boerdery. Ongelukkig kon die demonstrasie nie plaasvind nie weens ongunstige weerstoestande.

Hoewel die praktiese demonstrasie nie moontlik was nie, bly dit duidelik dat tegnologie ’n al hoe groter rol in moderne landbou speel. “Die boer van die toekoms werk nie net harder nie, maar slimmer – met tegnologie as ’n belangrike hulpmiddel.”Ná die teepouse het die fokus verskuif na entrepreneurskap en selfbegin-boerdery. Die Jongboer-finaliste Willem van der Merwe en Francois du Toit, wat albei in die derde plek aangewys is in verlede jaar se kompetisie, het hul ervarings gedeel oor hoe jong boere hul eie geleenthede kan skep en hul toekoms in landbou kan bou.

Opleiding en vaardigheidsontwikkeling was nog ’n belangrike tema. Shaun Welmans, uitvoerende hoof van Agri Skills Transfer, het beklemtoon dat kennis en opleiding noodsaaklik is vir sukses in ’n landboubedryf wat voortdurend ontwikkel.

Kabous van Schalkwyk van Manitou het ook gepraat oor die vennootskap tussen mens en masjien. Volgens hom gaan die boer van die toekoms nie net harder werk nie, maar ook slimmer deur tegnologie en moderne toerusting effektief te gebruik.

 

Die konferensie is afgesluit met ’n inspirerende boodskap oor nalatenskap en roeping in landbou. Jong boere is herinner dat ’n plaas nie net ’n besigheid is nie maar ’n nalatenskap wat oor generasies heen opgebou word.
“Die nuwe generasie boere is gereed om hul merk te maak en die toekoms van landbou te bou.”

Rooskleurige toekoms

Sulke konferensies speel ’n belangrike rol in die ontwikkeling van jong boere. Dit bied nie net kennis en praktiese raad nie, maar skep ook ’n ruimte waar boere mekaar kan inspireer en ondersteun. In ’n tyd waar landbou baie uitdagings in die gesig staar, bly samewerking en die deel van kennis noodsaaklik.

TLU SA se Jongboer-konferensie het duidelik gewys dat die toekoms van landbou in goeie hande is. ’n Nuwe generasie van boere is bereid om moderne idees te omarm, tegnologie te gebruik en met passie aan die toekoms van voedselproduksie te bou.