Trekkerverkope van 487 eenhede in Augustus is aansienlik (byna 18%) minder as die 591 eenhede wat verlede Augustus verkoop is. Vir die jaar tot dusver is trekkerverkope (vir die eerste agt maande van die jaar) steeds byna 7% hoër as verkope verlede jaar.

Stroperverkope van nege eenhede is drie eenhede minder as die twaalf eenhede wat verlede Augustus verkoop is. Vir die jaar tot dusver is stroperverkope nou ongeveer 7% laer as verkope verlede jaar.

Verskeie faktore het bygedra tot dié afname in die mark. Die faktore sluit onder andere die volgende in: die laat mielie-oes, kontantvloeikommer onder boere, probleme met bankfinansiering en politieke onsekerhede. Ongeag die laer verkope is die gevoel binne die landboumasjineriebedryf  oor die korttermyn steeds redelik optimisties. Sodra boere klaar hulle somergewasse geoes het en beplanning vir die nuwe seisoen begin, sal boere kyk na die aankoop van nuwe toerusting, veral omdat die onlangse swak waarde van die rand uiteindelik, later in die jaar, sal lei tot hoër pryse vir toerusting.

Ramings in die bedryf vir die 2018-kalenderjaar bly teen ʼn vlak van tussen 6 750 tot 7 000 eenhede, of tussen 5 en 10% hoër as verkope in 2017.

Bron: Suid-Afrikaanse Landboumasjinerieassosiasie