’n Nuwe hoofstuk vir ProAgri: Ons gaan digitaal – met die boer se beste belange op die hart

Beste ProAgri leser, ná 310 gedrukte uitgawes, duisende kilometers se rondry, en menigte stories oor die ongelooflike veerkragtigheid van Suid-Afrika se boere, staan ons vandag op die drumpel van ’n nuwe era. Dit is met trots en nederigheid dat ons hierdie belangrike aankondiging met julle deel: ProAgri skuif in 2026 oor na ’n volledig digitale tydskrifformaat.

Dit was nie ’n ligte besluit nie. Oor byna drie dekades heen was ons gedrukte tydskrif ’n vertroude metgesel op talle eetkamertafels op plase, koöperasie-toonbanke en koffietafels. En dit is julle, ons boere, vennote en lesers wat dit moontlik gemaak het. Julle ondersteuning, terugvoer, insette en lojale betrokkenheid het ProAgri elke maand laat groei. Daarvoor sê ons uit die diepte van ons harte baie, baie dankie.

Maar net soos die landboubedryf voortdurend ontwikkel, moet ons ook tred hou met die tye om meer toeganklik, vinniger en meer volhoubaar inhoud by elke boer te kry, ongeag waar in Afrika of elders in die wêreld jy jou mag bevind.

Die skuif na ’n digitale tydskrif stel ons in staat om:

• Ons maandelikse publikasies sonder onderbreking voort te sit;
• Dieselfde hoë gehalte, tegniese en relevante inhoud te lewer waarvoor ProAgri bekend is;
• Vinniger en meer dinamiese nuus, artikels en stories te deel; en
• Ons lesers se leeservaring te verbeter met maklike, onmiddellike toegang vanaf enige toestel.

Ons beloof julle, ProAgri se hart sit nog op die regte plek. Ons fokus steeds op: die boer, praktiese landbouoplossings, waardevolle raad, landboutegnologie en lekker leesstories oor boere sowel as nuus in die land. Jou digitale tydskrif sal steeds elke maand op ons webwerf beskikbaar wees. Net soos altyd, sal jy kan toegang kry tot onder meer die nuutste tegnologie, kundige advies, landbouverslae en boere se getuigskrifte wat ons met dieselfde passie en toewyding sal deel as met die jarelange skryf en publikasie van ons gedrukte tydskrifte.

Ons groei saam met julle, ons lesers. Saam vorm ons die toekoms van landboumedia – en saam staan ons sterker as ooit.

Baie dankie dat jy deel is van ProAgri se storie – van ons eerste gedrukte bladsy tot ons eerste digitale era. Die beste lê nog voor!

’n Voorspoedige feestyd en veilig reis totdat ons weer gesels in die eerste digitale uitgawe van 2026!

Landbougroete!

Bianca Pretorius
bianca@proagri.co.za