Deutz-Fahr maak ’n sterk terugkeer na Suid-Afrika met Smith Power aan die stuur. Toe Smith Power die verspreidingsregte van Deutz-Fahr in Suid-Afrika bekom het, was dit veel meer as net die toevoeging van nóg ’n trekkerhandelsmerk tot hul portefeulje. Dit het gedui op die terugkeer van ’n wêreldbekende naam wat reeds dekades lank sinoniem is met Duitse ingenieursvernuf, betroubaarheid en werkverrigting.

By vanjaar se Val Boeredag kon besoekers nie net die Deutz-Fahr-reeks van nader besigtig nie, maar ook die trekkers tydens praktiese demonstrasies in die veld sien werk.

Volgens Dennis van der Merwe, nasionale verkoopsbestuurder vir Smith Power se landbou- en konstruksie-afdeling, is daar groot opgewondenheid oor die handelsmerk se terugkeer.

’n Reeks vir elke boer

Terwyl groot trekkers van 145 tot 340 perdekrag (108 tot 254 kW) verlede jaar die kollig gesteel het, het Smith Power vanjaar doelbewus gefokus op die kleiner en middelklas-modelle van 45 tot 125 perdekrag (34 tot 93 kW), wat geskik is vir ’n groter verskeidenheid boerderye.

Hierdie skuif weerspieël Smith Power se doel om ’n volledige Deutz-Fahr-oplossing aan Suid-Afrikaanse boere te bied. Die internasionale vervaardiger se reeks strek van kompakte nuts- en plaaswerktrekkers tot hoëperdekragmasjiene vir grootskaalse graanproduksie, met ’n sterk fokus op brandstofdoeltreffendheid, operateursgerief en gevorderde tegnologie.

Demonstrasies wys die reeks se veelsydigheid

Een van die grootste trekpleisters by Smith Power se uitstalling was die lewendige demonstrasies, waar verskillende Deutz-Fahr-modelle onder werklike werksomstandighede ten toon gestel is. Die demonstrasies het nie net die trekkers se vermoëns uitgelig nie, maar ook gewys dat die reeks oplossings vir boerderye van verskillende groottes bied.

Deutz-Fahr 9340 TTV – Krag vir die grootste take

Die 9340 TTV is Deutz-Fahr se vlagskipmodel in die reeks en is ontwerp vir boere wat maksimum werkverrigting benodig. Die trekker word aangedryf deur ’n 7,8 liter-sessilinder Deutz-enjin wat tot 336 perdekrag (247 kW) lewer, met ’n indrukwekkende 1 372 Nm wringkrag. Die TTV (traplose/CVT)-transmissie sorg vir gladde kragoordrag en optimale brandstofdoeltreffendheid, terwyl ’n hidrouliese kapasiteit van tot 210 ℓ/min en ’n agterhysvermoë van 12 ton dit ideaal maak vir swaar grondbewerking en groot implemente.

By Val Boeredag is die 9340 TTV saam met ’n 19 tand-Kverneland-implement gedemonstreer, waar dit sy vermoë onder swaar trektoestande bewys het.

 

Deutz-Fahr 6155G – ’n  veelsydige werkesel

Die 6155G is gemik op boere wat een trekker vir ’n wye verskeidenheid take benodig. Met ongeveer 156 perdekrag (115 kW), ’n 6,1 liter-sessilinder Deutz-enjin, robuuste meganiese ontwerp en uitstekende brandstofdoeltreffendheid is dié model geskik vir grondbewerking, plant, hooimaak, voerwerk en algemene plaasbedrywighede. Die eenvoudige, gebruikersvriendelike uitleg maak dit ook maklik om te onderhou, terwyl die ruim kajuit operateursgerief verhoog gedurende lang werksdae.

Tydens die demonstrasie het die 6155G ’n 9 tand-Kverneland-werktuig getrek, wat sy veelsydigheid in medium- tot swaar veldwerk beklemtoon het.

Deutz-Fahr 6180 – ’n Verbetering met betrekking tot meer perdekrag

Die 6180 vorm die “brug” tussen die middel- en hoëperdekragsegment en is ontwikkel vir boere wat meer krag benodig sonder om na die grootste trekkers hoef oor te skakel. Met ongeveer 180 perdekrag (134 kW), gevorderde hidroulika, hoë hysvermoë en moderne elektroniese beheerstelsels is die trekker geskik vir groter planters, strooiers en grondbewerkingstoerusting. Die model bied ook uitstekende operateursgerief, presisieboerdery-opsies en lae brandstofverbruik vir lang dae in die land.

Dit is die eerste keer dat die 6180 tydens ’n openbare demonstrasie in Suid-Afrika ten toon gestel is, wat dit een van die hoogtepunte van Smith Power se uitstalling gemaak het.

Diens bly die sleutel

Hoewel die Deutz-Fahr-handelsmerk wêreldwyd bekend is vir sy Duitse ingenieursvernuf en tegnologie, beklemtoon Smith Power dat plaaslike ondersteuning net so belangrik is.

Die maatskappy het oor meer as vyf dekades heen ’n uitgebreide handelaars- en diensnetwerk regoor Suid-Afrika opgebou en sê die doel is om Deutz-Fahr nader aan boere te bring deur betroubare naverkopediens, onderdele en tegniese ondersteuning. Smith Power verteenwoordig reeds verskeie internasionale landbou- en toerustinghandelsmerke en beskik oor ’n gevestigde netwerk wat die bekendstelling van Deutz-Fahr verder ondersteun.

Vir Dennis is dit juis hierdie kombinasie van wêreldklastoerusting en plaaslike ondersteuning wat Smith Power se visie vir Deutz-Fahr in Suid-Afrika onderskei.

Opgewonde oor die toekoms

Val Boeredag het vir Smith Power die ideale platform gebied om boere weer aan Deutz-Fahr bekend te stel en die handelsmerk se toekoms in Suid-Afrika te bevestig.

Die belangstelling by die uitstalling en demonstrasies het gewys dat boere steeds groot waarde heg aan gehalte, betroubaarheid en goeie ondersteuning. Met ’n volledige trekkerreeks, ’n groeiende handelaarsnetwerk en die ondersteuning van ’n ervare plaaslike verspreider, glo Smith Power dat Deutz-Fahr gereed is om weer sy plek in Suid-Afrikaanse landbou in te neem.