John Deere bied die nuwe 3E-reeks kompakte nutstrekkers vir Afrika – ’n reeks wat ontwerp is vir produsente en grondgebruikers wat ’n kleiner veelsydige en betroubare trekker benodig.

Die 3036EN is smal ontwerp met ‘n 36 hp-enjin. Die trekker is geskik vir toepassings waar ruimte beperk is en presiese maneuvreerbaarheid belangrik is – onder meer in wingerde, groenteproduksie en ander rygewasse. John Deere beskryf die 3036EN as ’n spesialiteitstrekker wat juis vir hierdie tipe omgewings ontwikkel is.

Kompak van formaat. Groot op vermoë.

Die hart van die 3036EN is ’n driesilinder-enjin wat 26 kW, of ongeveer 35 hp, teen 2 800 r/min lewer. Die enjin is natuurlik geaspireer en vloeistofverkoel, met ’n oorloopreservoir wat deel vorm van die verkoelingstelsel. ’n Droëtipe dubbelfilter-lugreiniger help om die enjin onder stowwerige werksomstandighede te beskerm.

Vir produsente beteken dit ’n kompakte trekker met genoeg krag vir ’n wye reeks daaglikse take, sonder die grootte en gewig van ’n groter nuts- of rygewas-trekker.

Die 3036EN beskik oor meganiese vierwielaandrywing (MFWD), wat ekstra trekkrag en stabiliteit bied wanneer toestande ongelyk, los of uitdagend raak. Dit is veral waardevol in wingerde, boorde, groentelande en ander toepassings waar die trekker gereeld tussen rye en op verskillende oppervlaktes werk.

Beheer wat by die werk pas

Die transmissie bied 8 vorentoe- en 8 truratte, met ’n gesinchroniseerde vorentoe-/agteruit-skakelstelsel. Die vorentoe-snelheidsreeks strek van ongeveer 1,60 km/h tot 19,05 km/h, terwyl snelhede in trurat van 1,70 km/h tot 20,30 km/h beskikbaar is.

Hierdie ratkeuse gee die operateur die vermoë om die trekker se snelheid by verskillende take aan te pas – van stadiger werk tussen rye tot vinniger beweging tussen werksareas.

Die aftakas (PTO) lewer 21 kW ±5%, met ’n standaard 540 r/min-opsie asook 540E, wat die trekker geskik maak vir ’n verskeidenheid werktuie en toepassings.

Ontwerp vir beperkte ruimtes

Een van die 3036EN se grootste sterkpunte is sy smal ontwerp. John Deere posisioneer die model spesifiek vir toepassings waar beperkte rywydtes en maneuvreerbaarheid ’n belangrike rol speel. Die kompakte formaat, gekombineer met ’n goeie draaisirkel, maak dit makliker om in nou ruimtes te werk en tussen gewasrye te beweeg.

Die oop operateurstasie is ontwerp met gemak en praktiese gebruik in gedagte, terwyl ingeboude diagnostiese funksies help om masjienstatus te monitor en beskikbaarheid te ondersteun. John Deere beklemtoon juis operateursgerief, maneuvreerbaarheid en eenvoudige diagnostiek as kernvoordele van die nuwe 3E-reeks.

’n Nuwe toevoeging tot die John Deere AME-aanbod

Met die bekendstelling van die nuwe 3E-reeks in die Afrika en Midde-Ooste mark, bring John Deere sy bekende handelsmerk, ondersteuningsnetwerk en landboukundigheid na ’n kleiner, meer kompakte trekker segment.

Vir Suid-Afrikaanse produsente bied die 3036EN ’n nuwe opsie vir werk waar ’n konvensionele groter trekker eenvoudig te groot is. Van wingerde en groentelande tot instandhouding en algemene plaaswerk, die fokus bly dieselfde: praktiese werksverrigting, veelsydigheid en die betroubaarheid wat met die John Deere-naam verbind word.

John Deere 3E-reeks. Kompak waar dit moet wees. Gereed vir die werk wat gedoen moet word.