Laventel is ’n ou staatmaker in die tuin, maar het jy geweet jy kan die blommetjies ook in soet- en soutgeregte gebruik?

Laventel behoort aan die Lamiaceae– of mentfamilie, wat ook roosmaryn, tiemie, basieliekruid en marjolein insluit. Die blommetjies kan vars of gedroog in soet- en soutgeregte gebruik word.

Dit is belangrik om ’n laventelplant te koop wat geskik is om in kos gebruik te word – doen navraag by jou kwekery oor watter die beste is, maar kyk uit vir Lavandula angustifolia (Engelse laventel), en vermy Spaanse laventel, L. stoechas en L. intermedia, wat ‘n bitter, seperige smaak het.

Laventel-koffie

Klink laventel-latte vir jou na ’n lawwe idee? Begin met ’n bietjie laventel op ’n keer om jou gewoond te maak aan die smaak. Verhit ’n koppie melk tot kookpunt en laat dit saggies prut terwyl jy ’n paar laventelblommetjies daarin laat trek. Proe om seker te maak die laventelsmaak raak nie te sterk nie. Gooi die melk deur ’n siffie en gooi koffie by vir lekker melkkoffie (latte) met ’n laventelgeur. Strooi ’n knypie kaneel oor en versoet met heuning as jy wil, en versier met ’n paar laventelblommetjies bo-op.

Slaai

Vars laventelblommetjies kan ’n laatsomervrugteslaai lieflik opkikker. Maak ’n slaai van vars vrugte wat in seisoen is en roer ’n bietjie vars laventelblommetjies oor. Anders kan jy die vrugteslaai met roomys bedien wat jy met ’n strooisel vars laventelblommetjies kan versier.

’n Soet-soutslaai van groengoed en geroosterde vars vrugte in seisoen, neute en bessies kan bedien word met ’n slaaisous van olyfolie, heuning of balsamiese asyn – met ’n strooisel laventelblommetjies wat in ’n vysel met ’n stamper fyngemaal is. ’n Lepeltjie tuisgemaakte laventelstroop kan net so goed werk oor ’n vinnige slaai van waatlemoen, feta en mentblaartjies om ’n hetige laatsomerdag mee af te koel.

Gebruik dit in suurlemoenstafies

Suurlemoenstafies is ’n watertandkombinasie van soet en suur, maar jy sal ’n soeter smaak kry as jy Meyer-suurlemoene pleks van standaard suurlemoene gebruik. Die byvoeging van laventel verleen ’n skerp smaak aan die heuningagtige maar blomagtige geur van Meyer-suurlemoensap en -skil, sowel as die heerlike soetheid van versiersuiker, wat jou suurlemoenstafies verander in die soort nagereg wat jy gewoonlik by ’n duur bakkery sal aantref.

Gebruik standaard bestanddele vir suurlemoenstafies om Meyer-suurlemoen-laventelstafies te maak, maar maal die gedroogde laventelblommetjies met suiker om ’n laventelsuiker te vorm. Gooi die gemaalde laventel deur ’n sif om klonte te vermy – net ’n fyn poeier sal oorbly. Sprinkel die laventelpoeier oor een van die stafies saam met die versiersuiker. Jy moet net ’n bietjie laventel oorstrooi omdat daar genoeg laventel in die stafies is. Die sagte, gommerige binnekant en die taai korsie van hierdie stafies proe so deftig as wat hulle lyk.

Lavelentel-limonade

Suurlemoen en laventel is ideale pasmaats omdat hulle ’n helderkleurige, smaakvolle duo is. Laventel-limonade is ’n verfrissende en mooi drankie wat heerlik is as lafenis langs die swembad op ’n warm somersdag. Lemonade-kombinasies word lankal gebruik, waaronder aarbei- of waatlemoen – en hierdie metode gebruik ’n eenvoudige laventelstroop om ’n vinnige blom-geïnspireerde lemonade te maak. Sodra jy jou stroop het, voeg net varsgedrukte suurlemoensap asook suurlemoenskil en water by. Gooi dit in ’n mooi beker en bedien oor ys as ’n koue lekkerny.

Gee jou verbeelding vrye teuels en voeg bloubessies by vir ’n pragtige perskleurige drankie wat mooi saam met laventel pas of voeg mentblare by vir ’n verfrissende voorkoms en smaak. Pas die resep aan sodat dit soet of suur genoeg is volgens jou persoonlike voorkeur. Voeg beslis laventel by jou lemonade om ’n valerige drankie op te kikker!

Gebruik die blare in hoender piccata

In baie huise is hoender piccata ’n groot gunsteling vanweë die gereg se heerlike kombinasie van suurlemoen, botter en kappertjies. Baie laventelresepte gebruik laventelblomme maar dié gesonde hoender piccata-dis gebruik laventelblare, ’n smaaklike en kreatiewe manier om ander dele van laventel in jou kos te gebruik. Voeg die hoender wat in olyfolie gerooster is sowel as die kappertjies en laventelblare by hoenderaftreksel en botter en kook totdat die vloeistof verminder en effe dikker raak. Die geur van die blare sal meer prominent raak sonder om oorweldigend te wees.

Die laventelblare het ’n effe bitter kruiegeur. Dit bevat die “kern” van laventel sonder om oormatig blommerig te wees, terwyl die olyfolie kompleksiteit verskaf. Wanneer die gereg klaar is, sprinkel ’n paar laventelblomme saam met addisionele kappertjies oor vir ekstra tekstuur. Bedien jou hoender piccata saam met pasta, rys of risotto. Vir ’n ligter maaltyd, gebruik blomkoolrys.

Eksotiese skemerkelkies

Laventelblare en -blomme kan jou skemerkelkies pragtig laat lyk en heerlik laat ruik. Die plant raak al gewilder en die blomme en blare is tans dié bestanddeel om by skemerkelkies te voeg vir ’n lekker blomme-skop. Gebruik dit ook as versiering en sprinkel ’n paar laventelblomme oor skemerkelkies.

Meng of sif die kruiedeeltjies in ’n skemerkelkie in of maak ’n eenvoudige laventelstroop om in jou drankie te spuit vir ’n soet blomsmaak op jou tong. Voeg net ’n bietjie stroop by sodat jou drankie nie in ’n bitter konkoksie ontaard nie. Of probeer ’n jenewer en tonikum met laventel: gebruik die pers blommetjie saam met ’n botaniese jenewer wat die laventelsmaak die beste sal komplementeer.

Gebruik dit as saamgestelde laventelbotter

As jy ’n blomsmaak aan toebroodjies of gebak wil voeg, is saamgestelde laventelbotter die maklikste manier om dit te doen. Vat laventelblomme en kamertemperatuurbotter (die sagtheid van die botter laat dit makliker en meer egalig meng), en meng die bestanddele in ’n voedselverwerker totdat alles ten volle gemeng is. Gebruik slegs die blomme, die houtagtige stammetjie nie egalig sal meng nie en sal die botter taai maak.

Skraap die kante van die voedselverwerker en verwyder enige klonte vanaf die lemme. Pols dit vir nog ’n paar sekondes en skep dit dan uit op ’n laag kleefplastiek. Rol alles saam om ’n “stomp” te vorm en verseël die kante om seker te maak dit is heeltemal bedek wanneer jy dit in die yskas sit. Wanneer dit hard is, kan jy dit op ’n lekker korsige stukkie roosterbrood met ’n tikkie sout smeer. Of sit ’n skep botter op jou hoender piccata vir ’n blommerige sous.

Geniet ’n koppie laventeltee

Laventeltee

Die maklikste manier om gewoond te raak aan die gebruik van laventel in kos is om vir jou ’n koppie laventeltee te maak. Gooi kookwater oor ’n laventeltakkie met blare en al, of gebruik net die blomme vir ’n meer subtiele geur. Laat vyf minute trek en bedien met heuning of suiker. Vir ’n meer komplekse geur kan jy jasmyn of kamille byvoeg.

Franse flair

Meng geurige kruie om Herbs de Provence te maak, vernoem na die mengsel van droë kruie wat tipies is aan Provence, Frankryk. Hierdie konkoksie bevat dikwels basiliekruid, vinkelsade, laventel, marjolein, oreganum, roosmaryn, boontjiekruid (savory), dragon (tarragon) en tiemie. Elke Herbs de Province-resep is egter ’n bietjie verskillend en gebruik dikwels ander speserye of laat sommige doodeenvoudig uit. Sprinkel dit oor hoender of geroosterde groente – die moontlikhede is eindeloos.

So ’n kruiemengsel is veral ’n gerieflik en kreatiewe manier om laventel in jou kos te gebruik as jy onseker is oor wat om te maak of nie al die bestanddele het nie. Dit kan sowat ses maande lank hou in ’n verseëlde houer is omdat dit ’n geurmiddel is. Jy kan dit gebruik saam met iets op jou inkopielysie of sprinkel dit oor vleis of groente as jy nie ’n ingewikkelde resep wil volg nie. Jy kan soveel gebruik as wat jy wil, en gebruik dit ook met ander geurmiddels soos uie- en knoffelpoeier.

Soetkoekies

Kikker outydse soetkoekies op met laventelblommetjies vir ’n anderse bederf. Hier’s ’n resep uit Huisgenoot se Wenresepte 2 (indien jy jou ouma en jou ma se resep verloor het). Ek het die resep ’n bietjie aangepas met die toevoeging van die laventelblommetjies.

Verwerk ’n handvol skoon, droë laventelblommetjies in ’n voedselverwerker tot fyn.

Verroom 250 g botter of margarien by kamertemperatuur met 600 g (750 ml) suiker en vyf groot eiers. Sif 800 g meelblom, 30 ml bakpoeir, 5 ml vanieljegeursel en 2 ml sout saam en voeg by die eiermengsel. Voeg van die fyngekapte blommetjies by die koekiemensel. Bedek die deeg en laat rus vir ’n halfuur. Voorverhit die oond tot 200 °C en smeer ’n bakplaatliggies.

Rol die deeg dun op om ’n oppervlak wat liggies met meel bestrooi is. Druk sirkels van sowat 5 cm in deursnee met ’n koekiedrukker uit. Plaas die deegsirkels ’n entjie uitmekaar op die gesmeerde bakplaat. Meng een geklitste eier en 25 ml melk en verf oor die rou koekies. Strooi ’n bietjie suiker gemeng met die fyn laventelblometjies bo-oor die koekies en bak op die middelste oondrak tussen 8 en 10 minute lank of totdat die koekies goudbruin is. Laat die koekies effe op die bakplaat afkoel voordat jy dit versigtig op ’n afkoelrak oorplaas om heeltemal koud te word. Bêre in ’n lugdigte houer.

Soete verleiding

Gebruik dit in ’n soet pastei

As jy onseker is oor die gebruik van laventel in jou kos, bak dit in ’n pastei in sodat jy die geur kan verbloem of versterk op ’n smaaklike manier. Bak ’n supersoet, dekadente pastei met laventel-ekstrak wat net ’n tikkie van die strelende laventelsmaak bevat. Hou by die perserige kleurtema en maak ’n bloubessie-laventelpastei of hou by die suurlemoen-laventelkombinasie vir ’n suurlemoen-laventel-meringuepastei.

’n Tuisgemaakte pruim-laventelpastei het ’n unieke geur met sappige pruime, gedroogde laventelblomme en ’n bietjie suurlemoensap om alles bymekaar te voeg. Maal die blomme tot ’n poeier met ’n stamper en vysel en bedek dan die pruime met die poeier en die oorblywende bestanddele. Die sap van die pruime behoort ’n verdikte stroop te vorm, maar jy kan die proses fasiliteer deur die vloeistof in ’n pan te voeg en dit te verhit totdat dit verdik. Kragerige turbinado-suiker (rou rietsuiker), die sagte pruime en botterige, skilferkors skep saam ’n simfonie van geure.

Laventelkorse vir vleis

Broodkrummels, graanvlokkies, peperkorrels en koffie is bekende maniere om ’n kors aan vleis te verleen, maar ’n laventelkors sal jou sintuie betower. Hierdie heerlike, geurige blomme bied ’n kors waarvan jou sig-, reuk- en smaaksintuie sal hou. ’n Varktjoppie met ’n laventelkors kan vinnig voorberei word. Hierdie resep meng gedroogde laventel, origanum en rissievlokkies om die kors van die vleis te vorm.

Bedek alle kante van die tjop met jou geurmiddels. Soteer dit in olyfolie totdat albei kante bruin is en bedruip dan met botter en kook totdat die varktjops ferm raak. Jy kan dieselfde kors gebruik vir steak, beesfilet, hoender, lamtjops of vis. Bedien met kapokaartappels en Parmesan-geroosterde Brusselse spruite of broccoli.

Geklopte room

Verleen ’n blommerige smaak aan jou tuisgemaakte, geklopte room deur dit met vars of gedroogde laventel te meng. Neem jou swaar kloproom en laventelblomme en verhit die room op die stoof totdat dit begin kook. Verlaag die hitte sodat dit die room prut, voeg jou laventel by en skakel die hitte af. Los die laventel en room in die pan en gee dit tyd om behoortlik te meng. Dit moet geurig ruik. Kruie soos laventel is beslis die beste toevoeging tot geklopte room, maar jy kan ook speserye soos wonderkruie (allspice) of kaneel by die room voeg.

Laat dit afkoel en syg dit om die laventelblomme uit die mengsel te verwyder. Maak jou geklopte room soos gewoonlik met suiker en ’n tikkie vanielje en klop totdat dit die klassieke stywe pieke vorm. Jy kan hierdie gegeurde geklopte room gebruik in enigiets, van warm sjokolade tot kolwyntjies. Sit ’n groot lepel room op ’n aarbeiroomys-float en bedek met laventelblomme en vars aarbeie. Jy kan ook ’n rabarber (rhubarb)-galette bak met ’n aarbei-laventelglaseersel en met vars geklopte laventelroom bo-op.

Maak lemoen- en laventelmarmelade

Die kook van ’n houer konfyt of marmalade is ’n eenvoudige en smaaklike manier om ekstra vrugte te gebruik. Konfyt word van amper enige vrugte gemaak maar marmalade word in die algemeen van lemoene gemaak. Eksperimenteer egter deur bestanddele by te voeg soos laventel en skep ’n unieke smaak wat jou ontbyt-roosterbrood sal opjazz.

Dis belangrik om te noem dat jy die soort sitrus vir jou marmalade moet kies in terme van hoe jy wil jou marmalade moet proe. Wil jy hê dit moet skerp en suur op die tong wees of verkies jy ’n nektaragtige stroop? ’n Cara Cara-lemoen is soet en sappig terwyl ’n bitter lemoen wel … bitter is. Ongeag jou voorkeur, voeg laventel by wanneer dit by die suiker kom. Moenie pektien byvoeg nie, daar is genoeg in die skil. Marmalade gaan grootliks oor tekstuur aangesien daar ’n bietjie skil in elke happie is, en dus is laventelblomme ’n lekker toevoeging.

Koekversiering

Laventelplante is pragtig. Hulle lok bye en bestuiwers en die mens geniet hul voorkoms. Hulle ruik lekker en het kalmerende eienskappe. Dit maak dus sin om hulle nie net vir geur en fleur te gebruik nie, maar ook as versiering. Laventel is een van die baie soorte eetbare blomme wat jy op jou gebak kan sit.

Dis ’n mooi en opvallende manier om koek te versier. Gebruik die pers en lila van laventel om ’n sponskoek vrolik op te kikker. Gebruik die hele plant, van die blomme tot die blare en stingel as jy dit van die koek af gaan verwyder of span die blomknoppies in as jy hulle op die koek wil los. Hierdie is een van die kreatiefste maniere om laventel in jou kos te gebruik, omdat jy jou verbeelding kan gebruik tydens die versieringsproses!

Lees meer:

https://www.tastingtable.com/1512587/ways-to-use-lavender-in-cooking/ 15 Creative Ways To Use Lavender In Your Cooking Deur Carmen Varner

https://www.britannica.com/plant/Lamiaceae

https://www.backyardgardenlover.com/culinary-lavender-varieties/ 7 Best Culinary Lavender Varieties to Grow (And What to Do with Them) Deur Serena Manickam

https://www.allrecipes.com/recipe/8300592/perfect-chicken-piccata/