Voermengers is een van die belangrikste implemente op enige plaas. Boere se vee moet aaneenlopend gevoer word, en hoe jy die voer by hulle kry, is van kardinale belang. Suid-Afrika se boere doen dit reeds dekades lank op ’n betroubare manier: hulle koppel hul voermenger aan ’n trekker en sleep hom na hul diere.

Maar enige boer wat al moes sukkel om alles in stormweer te ontkoppel, en buitendien ook te herkoppel, verstaan dat dit nie altyd die gerieflikste oplossing is nie. Dit is waar Rumax inkom met sy permanente voermenger wat op ’n vragmotor gemonteer word.

Hierdie gemonteerde voermenger-vragmotor-kombinasie het groot getalle besoekers gelok na die Rumax-standplaas by NAMPO Kaap vanjaar. Daar kon hulle ’n Iveco Eurocargo 150-240-trok met ’n Rumax 15-voermenger agterop gemonteer, met hul eie oë sien.

In plaas daarvan om te sukkel met ’n trekker wat eers ’n ander toestel moet ontkoppel, of wat te groot is vir sekere paaie, bied hierdie masjien ’n volledige oplossing.

’n Voermenger wat agterop ’n vragmotor gemonteer is, maak dit maklik om voer te vervoer.

’n Nuwe era breek aan vir voermengers

Jaco Pieters, eienaar en stigter van Rumax, het vertel dat hierdie idee sy oorsprong gehad het in ’n reeds bestaande voorbeeld wat in die buiteland gebruik word. Voermengers wat agter op ’n trok gelaai word, kom algemeen in lande soos Amerika voor.

Hy het verduidelik dat ander modelle van hierdie voermengers reeds ingevoer word, maar dat hierdie model uniek aan Suid-Afrika is. Die hele stelsel word op die vragmotor geplaas en gekoppel by Rumax se vervaardigingsfabriek in Worcester in die Wes-Kaap.

Boere wat graag die stelsel of iets soortgelyks wil hê, kan hul eie vragmotor na die vervaardigingsfabriek stuur en dan sal Rumax ’n voermenger, ’n strooier of ’n ander stelsel op die vragmotor bou. Jaco het beklemtoon dat die proses nie die voertuig se ratkas sal beskadig nie, wat baie belangrik is.

“Die groot voordeel hiervan is dat ons ’n drukverligtingsklep (pressure relief valve) het wat jou ratkas beskerm. Ons haal die helfte van die ratkas af en gebruik nie die planetêre gedeelte nie. Ons dryf hom dan hidroulies aan, wat verseker dat die ratkas goed beskerm word.”

Jaco Pieters, eienaar en stigter van Rumax, en Kirstein Burger Rumax, verkoopspersoon.

Voermengers is belangrik vir boere en hul diere

Of jy nou ’n melkplaas, ’n voerkraal of ’n stoet het, enige boer weet dat die gesondheid en waarde van sy vee afhang van dit wat jy hulle voer. Rumax se voermengers verseker dat jou veevoer oor die korrekte balans beskik om tot gesonde en sterk diere te lei.

“Die voermenger verseker ’n gebalanseerde rantsoen, sodat die dier nie kan uitsoek nie. Dit verbeter voerinname, verminder vermorsing en ondersteun beter dieregesondheid,” het Jaco verduidelik.

Vir meer inligting oor hoe Rumax jou boerdery kan verbeter, skakel 023-342-6070, stuur ’n e-pos na jaco@rumax.co.za of besoek www.rumax.co.za