Trekkerverkope van 548 eenhede in April is 4% meer as die 527 eenhede wat verlede April verkoop is. Vir die jaar tot dusver is trekkerverkope nou byna 3% meer as verkope verlede jaar. Twee-en-vyftig stropers is in April verkoop, ses meer as die 46 eenhede wat verlede April verkoop is. Vir die jaar tot dusver is stroperverkope nou ongeveer 9% meer as verkope verlede jaar.

Sentiment in die mark het onlangs verander na onsekerheid en omsigtigheid. Pryse vir diesel en kunsmis het, onder andere, skerp gestyg. Vooruitsigte vir somergewasse lyk belowend, hoewel sekere oeste gekniehalter word deur die laat reën. Kommoditeitspryse het aansienlik gedaal sedert verlede jaar.

Soos die oesproses vorder behoort boere ’n beter raming van produksie te kan maak. Daar is egter geen twyfel nie, boere sal noukeurig moet kyk na insetkoste vir die komende somergewasseisoen en kan besluit om eers belegging in kapitaaltoerusting terug te hou.

Volgens ramings in die bedryf, sal trekkerverkope vir die 2026-kalenderjaar soortgelyk of marginaal minder wees as verkope in 2025.

Bron: Suid-Afrikaanse Landboumasjinerieassosiasie