Categories: NuusPublished On: 19th March 2024

Strategiese vennootskap aangekondig om baanbrekerswerk te doen met gevorderde kernenergie-oplossings vir landbou in Suid-Afrika en ander lande

By 3 min read

The panel_ Francois Mellet, dr Kelvin Kemm, Chris Opperman and Francois Rossouw

Francois Mellet, elektriese ingenieur en besturende direkteur, Stratek Global, Dr Kelvin Kemm, kernfisikus en voorsitter, Stratek Global, Chris Opperman, bedryfsvennoot by C5 Capital vir Afrika en die Midde-Ooste, Francois Rossouw, uitvoerende hoof van Saai.

Die Suider-Afrika Agri-inisiatief (Saai) en C5 Capital, ’n baanbrekersbeleggingsfirma gebaseer in Washington DC wat spesialiseer in gevorderde kernenergie-oplossings het vandag ’n grensverskuiwende strategiese vennootskap aangekondig.

Hierdie bondgenootskap het ten doel om die leiding te neem met die ontwikkeling van innoverende kernoplossings om landbou te versterk en voedselsekerheid oor die hele Suid-Afrika en die breër kontinent heen te verseker. Hierdie inisiatief dui nie net op noemenswaardige vordering ten opsigte van alternatiewe energie-oplossings vir streke wat geteister word deur wisselvallige energieproduksie nie, maar vestig ook ’n standaard vir soortgelyke projekte oor die hele Afrika heen.

Die vennootskap is gegrond op ’n wedersydse verbintenis om gevorderde kerntegnologie te benut om landboupraktyke te vernuwe, natuurlike hulpbronne te bewaar en voedselsekerheid te verhoog. Die samewerking sal die toepassing van baanbrekerkerntegnieke ondersoek om onder meer landbouproduktiwiteit, dieregesondheid, voedselveiligheid en -kwaliteit en doeltreffende grond- en waterbestuur te verbeter.

’n Drieledige strategie staan aan die kern van hierdie inisiatief. Dit sluit in die langtermyn-integrasie van gevorderde kernenergie-opwekking in die Suid-Afrikaanse landbou; die innoverende toepassing van kunsmatige intelligensie (KI) in boerderypraktyke; en die ambisieuse onderneming van landbou in die ruimte sowel as die toepassing van ruimte-gebaseerde data vir landbou. Hierdie veelvlakkige benadering beklemtoon die vennote se toewyding aan die gebruik van tegnologie vir volhoubare landbou-ontwikkeling.

Die aankondiging lui ook die voortsetting van C5 Capital se strategiese visie in en bou voort op die maatskappy se bestaande planne om ’n klein modulêre kernreaktor (SMR) te bou vir energie-onttrekking deur vooraanstaande datasentrummaatskappye in Kaapstad. Hierdie projek beklemtoon nie net die tegnologiese vaardighede in die streek nie, maar dui ook op ’n terugkeer en ’n evolusie van Suid-Afrika se eens leidende rol in die ontwikkeling van ’n modulêre korrelbedreaktor (PBMR).

Suid-Afrika was in die verlede aan die voorpunt van die ontwikkeling van tegnologie vir die PBMR en het betrokke geraak by internasionale samewerking wat aansienlike vooruitgang in die vroeë 2000’s beleef het. Ten spyte van die daaropvolgende beëindiging van Suid-Afrika se PBMR-ontwikkelingsprogram, is hierdie vennootskap daarop gemik om die land se nalatenskap in kerninnovasie te laat herleef met trots Suid-Afrikaanse tegnologie wat deur die jare verfyn en verbeter is.

“C5 Capital is verheug om met hierdie transformerende onderneming kragte saam te snoer met Saai,” voer Chris Opperman, bedryfsvennoot vir C5 Capital, aan. “Deur ons kundigheid in gevorderde kernoplossings te kombineer met Saai se diepgaande begrip van landboubehoeftes, is ons gereed om ’n wesenlike impak op energievolhoubaarheid en voedselsekerheid in Suid-Afrika en ander lande te maak,” sê André Pienaar, uitvoerende hoof van C5 Capital.

Saai is ewe optimisties: “Die vooruitsig van ’n betroubare energiebron in landelike gebiede verander die energiespel geheel en al, wat nie net die mededingendheid van kommersiële boere verbeter nie, maar ook deurslaggewend is vir die modernisering en kommersialisering van kleinboere. Hierdie onderneming is ’n reusestap tot hul vestiging as winsgewende produsente en belangrike bydraers tot streeksvoedselsekerheid,” sê dr. Theo de Jager, direksievoorsitter by Saai.

Hierdie vennootskap weerspieël nie net beduidende vooruitgang na volhoubare energie en landbou-ontwikkeling in Suid-Afrika nie, maar dien ook as ’n baken vir toekomstige inisiatiewe oor Afrika heen om die kritieke uitdagings van energiebetroubaarheid en voedselsekerheid deur tegnologiese innovasie en samewerking te takel.

Oor C5 Capital

C5 Capital (C5) is ’n spesialis waagkapitaalfirma wat in kuberveiligheid, ruimte- en energiesekuriteit belê. C5 se beleggingstrategie is daarop gefokus om langtermynverhoudings met innoverende en veerkragtige stigters te bou wat deel in sy missie om ’n veilige toekoms te bou. C5 Capital se hoofkantoor is in Washington DC met kantore in Londen, Luxemburg en Wene. Besoek www.C5Capital.com vir meer inligting.

Bron: SAAI

Deel hierdie artikel.

Leave A Comment