Vir baie mense is blomme bloot iets mooi om na te kyk. Vir Teneale Coetzee, stigter van Femme Pétale-blommeplaas in Boschkop, Pretoria, vertel elke blom egter ’n storie. Een van geloof, genesing, deursettingsvermoë en die moed om weer van voor af te begin.

Wat vandag ’n gevestigde blommeplaas, blomme-ontwerpateljee, opleidingsentrum en agritoerismebestemming is, het nooit as ’n groot sakeplan begin nie. Dit het begin as gevolg van ’n eenvoudige frustrasie.

“Ek wou my eie blomme begin kweek omdat die kleure en variëteite waarna ek gesoek het meestal ingevoer word. Hulle was nie altyd beskikbaar nie, is met chemikalieë behandel en was dikwels nie meer vars wanneer hulle hier aangekom het nie,” vertel Teneale.

Nadat sy in 2014 met melanoom gediagnoseer is, het sy opnuut begin kyk na die omgewing waarin sy leef en werk.

“Ek het reeds sonder blommerangskikkingskuim gewerk, maar wou nóg meer doen om op ’n natuurlike en volhoubare manier te werk. Die gedagte om self blomme te kweek, het eenvoudig nie uit my kop verdwyn nie.”

Daar was nie een spesifieke oomblik waarin Teneale besef het blommeboerdery is haar roeping nie. Dit was eerder honderde klein oomblikke: die vreugde wanneer saadjies ontkiem, die eerste blom wat oopgaan, die gezoem van bye tussen die blomme en die rustigheid wat ’n mens ervaar wanneer jy ná ’n moeilike dag deur die lande stap. Daardie oomblikke het uiteindelik saam ’n droom gevorm.

Meer as net ’n blomplaas

Femme Pétale is vandag veel meer as net ’n plaas waar snyblomme verbou word. Dit is ’n plek waar mense leer, skep en weer met die natuur in aanraking kom.

Hier word ongewone snyblomme volgens regeneratiewe boerderybeginsels gekweek, blomontwerp sonder blomskuim beoefen en werkswinkels aangebied waar besoekers self die reis van saad tot blom kan beleef.

Vir Teneale begin alles by die grond.

“Gesonde grond is die belangrikste deel van enige plaas. As jou grond nie gesond is nie, gaan jou plante ook nie wees nie.”

Hoewel die eindproduk delikaat en beeldskoon is, is die pad daarheen allesbehalwe maklik. Die weer bly een van Teneale se grootste uitdagings, veral omdat sy buite produseer en vir spesiale geleenthede moet beplan. Sy glo egter die grootste wanopvatting oor blommeboerdery is dat dit maklik is.

“Mense dink blommeboerdery is net mooi foto’s tussen die blomme. Dit is ongelooflike harde werk, maar die beloning maak alles die moeite werd.”

Vroue wat saam groei

Hoewel landbou steeds dikwels as ’n manswêreld beskou word, sien Teneale dat al hoe meer vroue hul plek in kleinskaalse boerdery inneem.

Vir haar gaan Vrouemaand nie net oor erkenning nie, maar oor daadwerklike ondersteuning.

“Ek werk doelbewus saam met vroue-ondernemings vir ons keramiek, kunswerk, verpakking, fotografie, handelsmerk en webwerf. Ondersteuning behoort nie net een maand van die jaar plaas te vind nie. Vrouemaand gee ons bloot ’n groter platform om mekaar te vier.”

Soos enige boer het Teneale ook al dae beleef waar sy gewonder het of sy kan aangaan.

“Selfs nou voel dit soms of die reis my gebreek het. Dan herinner God my weer daaraan dat daar ’n doel met hierdie werk is.”

Teneale sê dit is haar geloof, haar familie en die impak wat die plaas op ander mense het wat haar telkens weer laat opstaan.

’n Droom wat aanhou groei

Vir die volgende paar jaar droom Teneale daarvan om Femme Pétale as een van Gauteng se voorste agritoeristebestemmings te vestig. ’n Plek waar mense blomme, kos, tuinmaak, kreatiwiteit en gemeenskap saam kan beleef.

Sy wil ook meer vroue bemagtig deur geleenthede te skep vir dié wat mishandeling, verlies of verwerping ervaar het, sodat die plaas ’n ruimte kan wees waar hulle weer hoop en nuwe moontlikhede kan ontdek.

Aan vroue wat daarvan droom om hul eie blommeplaas of onderneming te begin, gee sy eenvoudige maar kragtige raad.

“Begin waar jy is. Jy hoef nie alles perfek te hê nie, en jy het nie ’n groot stuk grond nodig nie. Begin met wat jy het, leer elke dag en laat jou besigheid saam met jou groei.”

Teneale se persoonlike lewensmotto vat uiteindelik nie net haar onderneming saam nie, maar ook die boodskap wat sy met elke blom wil oordra:

“Blomme inspireer dankbaarheid, en dankbaarheid is die saad van vreugde.”

Femme Pétale in kort

Geleë in Gauteng

Spesialiseer in unieke snyblomme

Regeneratiewe blommeboerdery

Bud to Business-opleidingsprogram vir aspirantblommeboere

Werkswinkels en agritoerisme-ervarings

Volhoubare blomme-ontwerp sonder blomskuim

Vir meer inligting, besoek www.femmepetaleflowers.co.za