Hommeltuie is besonder interessante toestelle. Baie mense het al gesien dat hierdie klein vlieënde toestelle gebruik kan word vir die neem van uitstekende video’s en foto’s. Hommeltuie neem alles van rugbyvelde tot seeduine af. Vir ’n boer beteken ’n hommeltuig egter baie meer as dit.

Hommeltuie wat oor landerye vlieg, monitor die oes en plantgroei, kyk of diere veilig is, spuit kunsmis en plaagdoders en verrig nog vele ander take. Op ’n plaas is hommeltuie werkende toerusting wat doeltreffend en betroubaar moet wees.

Dit is dus uiters belangrik om te weet waarna om te kyk voordat die hommeltuig opstyg en voordat dit land.

Jou kontrolelys voordat die hommeltuig opstyg

Kontroleer die hommeltuig en die toerusting

• Maak seker alle batterye is ten volle gelaai.
• Maak seker die beheerder verbind met die hommeltuig.
• Maak seker dat alle propellers werk en vryelik kan draai.

Maak seker dat alles op die hommeltuig gelaai is

Of jy nou gaan spuit of slegs sekere dele van die plaas gaan inspekteer, maak seker dat die hommeltuig korrek toegerus is met alles wat vir die taak benodig word.

Kontroleer die opstyg- en vlieggebied

Daar moet geen laaghangende drade of takke wees nie. Maak ook seker dat daar geen ander vliegtuie of hommeltuie in die gebied is nie.

Toets die opstyg en landing

Voordat die hommeltuig wegvlieg, moet dit eers aangeskakel word, opstyg en weer land. Dit bevestig dat alle stelsels korrek werk.

Gee ’n waarskuwing

Verskillende waarskuwingsfrases word gebruik, maar in Suid-Afrika is die algemeenste waarskuwing voordat die hommeltuig opstyg “Clear Prop”.

Waarskuwingswoorde voor bespuiting

Voordat die hommeltuig begin spuit, is die laaste waarskuwingswoorde wat gebruik word “Clear Spray”. Dit waarsku enigiemand wat moontlik in die landery is teen die hommeltuig en die bespuiting.

Interessante feit: Hommeltuie beheer hul rigting deur die spoed en wring van hul propellers individueel aan te pas. Hierdie verskille in rotasiespoed laat die hommeltuig optsyg, land, en ook van rigting verander.

Jou kontrolelys voordat die hommeltuig land

Maak seker die landingsgebied is veilig

Voordat die hommeltuig terugvlieg, maak seker dat daar geen toerusting, ander hommeltuie of mense in die gebied is waardeur dit gaan vlieg nie. Hommeltuie op plase vlieg dikwels kophoogte om doeltreffend te spuit.

Hou die landingsgebied skoon

Maak seker dat die grond, bakkie of platform waarop die hommeltuig moet land, reeds skoon en vry van drade, gereedskap en mense is.

Waarskuwingswoorde wanneer die hommeltuig terugkeer

Daar is twee stadiums waartydens ’n waarskuwing nodig is. Wanneer die hommeltuig begin terugvlieg, gebruik die waarskuwing “Coming Home” of “Drone Returning”.

Waarskuwing net voordat die hommeltuig land

Wanneer die hommeltuig gereed is om te land, gebruik die waarskuwingswoorde “Drone Landing” of “Clear Ground”.

Wag voordat enigiemand nader beweeg

Voordat jy of enigiemand anders nader beweeg om die hommeltuig byvoorbeeld met spuitmiddel te hervul, moet almal wag. Skakel die hommeltuig af en maak seker dat die propellers heeltemal tot stilstand kom.

Finale bevestiging

Die hommeltuigvlieënier gee die finale bevestiging voordat enigiemand nader mag beweeg. Die woorde is: “All Clear”.