Tydens ’n onlangse besoek aan die Hoër Landbouskool Marlow in Cradock in die Oos-Kaap, het dit duidelik geword dat Limagrain se betrokkenheid veel verder strek as slegs produkte op ’n rak. Vir die afgelope vyf jaar werk Limagrain nou saam met die skool om die leerders bloot te stel aan praktiese landboukennis wat nie altyd binne ’n klaskamer aangeleer kan word nie.

Volgens Zannel Keogh, hoof van landbou by Marlow, het Limagrain ’n betekenisvolle verskil gemaak aan die manier waarop die skool landbou-onderrig benader.

“Ons stap al ’n lang pad saam met Limagrain, en dit is vir ons besonders om te weet dat hulle in ons skool belê,” sê sy. “Hulle bring kennis oor mielie- en lusernsaad, maar meer as dit, hulle gee ons kinders insig in die wêreld daar buite.”

Hierdie samewerking bied aan leerders iets van onskatbare waarde, blootstelling aan kundigheid uit die bedryf. Waar onderwysers nie altyd spesialiste in elke landbouveld kan wees nie, vul Limagrain daardie leemte met praktiese ervaring en professionele leiding.

Vir die seuns van Marlow beteken dit dat landbou nie net ’n vak bly nie, dit word ’n tasbare deel van hul toekoms.

“Die kinders leer nie net uit boeke nie,” verduidelik Keogh. “Hulle sien die mense van Limagrain op die plaas, by sportbyeenkomste, skoolfunksies en veillings. Hulle bou reeds van jongs af verhoudings met mense in die bedryf. Dit gee hulle vertroue dat daar iemand is na wie hulle kan uitreik wanneer hulle eendag self in landbou instap.”

Dit is presies hierdie menslike benadering wat Limagrain se betrokkenheid so uniek maak. In ’n tyd waar baie korporatiewe beleggings bloot op wins gefokus is, kies Limagrain om in mense te belê, in jong mense met potensiaal, passie en ’n liefde vir die grond.

Fanie Yssel, Limagrain se tegniese bestuurder vir agronomie, vereis die tipe betrokkenheid wat vandag al hoe skaarser raak, ’n kundige wat nie net tegniese ondersteuning bied nie, maar ook sy kennis deel om ander op te bou. Dit skep nie net beter produsente vir môre nie, maar ook sterker landbougemeenskappe.

Vir ’n skool soos Marlow, wat al amper 95 jaar lank jong manne vir die landbou voorberei, is sulke vennootskappe van kardinale belang. Met nuwe uitbreidings op die plaas en ’n hernude fokus op praktiese opleiding, glo die skool dat hul verhouding met Limagrain nog verder gaan groei.

“Ons is afhanklik van maatskappye soos Limagrain,” sê Keogh. “Ons het mense van buite nodig wat bereid is om in ons kinders en in die toekoms van landbou te belê.”

En dit is dalk die kern van Limagrain se storie in Suid-Afrika: hulle verkoop nie net saad nie – hulle help om die volgende generasie boere te kweek.

In ’n land waar voedselveiligheid en volhoubare landbou al hoe belangriker word, wys Limagrain dat ware groei begin wanneer ’n maatskappy besluit om nie net in oeste te belê nie, maar in mense.