Agter elke betroubare hamermeul, menger en robuuste stuk toerusting wat Drotsky se fabrieksvloer verlaat, is ’n span toegewyde vroue wat die maatskappy dag ná dag met harde werk, visie en ’n warm hart aan die gang hou. Van die verkryging van die kleinste boutjie tot die hantering van internasionale uitvoere, is Thea, Sarah, Fouzia en Alomia die dryfkrag agter Drotsky se sukses.

Steunpilare van aankope en logistiek

Voordat ’n masjien op ’n plaas aan die werk gesit kan word, begin die proses met noukeurige beplanning. Thea is verantwoordelik vir die dag-tot-dag-aankope en die verkryging van al die fabrieksbenodigdhede.

Deur grondstowwe, onderdele en verskaffers sorgvuldig te bestuur, verseker sy dat die produksielyn nooit stilstaan nie en dat ambagsmense altyd die nodige materiaal het om doeltreffend kan werk. Thea glo gehalte begin by die regte onderdele.

Vir Thea is Drotsky egter veel meer as net ’n werkplek; dit is ’n roeping waar familiewaardes, wedersydse respek en opregte omgee die grondslag vorm.

Saam met Thea vorm Sarah deel van die aankope- en verkoopspan. Haar loopbaan by Drotsky het 16 jaar gelede as kombuisassistent begin. Danksy haar vasberadenheid en gewilligheid om te leer, het sy deur die jare gegroei tot ’n onmisbare steunpilaar van die span.

Sarah luister na boere se behoeftes en werk nou saam met verskaffers om moontlike vertragings te identifiseer en te voorkom voordat dit probleme veroorsaak. Vir haar gaan verkope en aankope oor betroubaarheid waarop boere moet kan staatmaak, want boere se lewensbestaan hang van hul masjiene af.

Passie vir mense, menslike hulpbronne en verkope

Toe Fouzia in 2015 by Drotsky aangesluit het, het sy geen vorige ervaring in menslike hulpbronne, salaris-administrasie of verkope gehad nie. Vandag hanteer sy hierdie uiteenlopende verantwoordelikheide met gemak en selfvertroue. Haar filosofie is eenvoudig: Gelukkige werknemers lei tot tevrede kliënte.

Wanneer die druk toeneem, vervaag die grense tussen die afdelings en werk die hele span saam as een. Fouzia huiwer nie om vir kliënte te sê dat hulle nêrens ’n beter hamermeul of ’n meer toegewyde span sal vind nie.

Dan is daar Alomia, die bekende “stem” van Drotsky. Sy het as 17-jarige matriekleerling gedurende skoolvakansies by Drotsky se ontvangs kom uithelp. Sedertdien het sy amper elke rol in die maatskappy vervul, en in 2010 het sy die Exporter of the Year-toekenning ontvang vir haar doelgerigte werk.

Vandag dryf sy verkope en uitvoere teen ’n dinamiese tempo aan. Alomia gebruik moderne tegnologie en platforms soos WhatsApp, Facebook, TikTok en YouTube om verhoudings met boere wêreldwyd te bou en te versterk, maar tog bly persoonlike aandag, opregte omgee en goeie nadiens vir haar ononderhandelbaar.

Meer as net ’n besigheid

Wat hierdie vier vroue se stories met mekaar verbind, is die unieke kultuur by Drotsky. Dit is ’n plek waar elkeen op sy of haar naam geken word en waar besigheid met menslikheid en ’n warm hart gedoen word. As bewys van hierdie hegte band, vertel Alomia hoe die Drotsky-span haar onwrikbaar bygestaan het toe sy haar lewensmaat aan die dood afgestaan het.

Hierdie vier vroue bewys daagliks dat Drotsky se sukses nie slegs gemeet word aan die masjiene wat gebou word nie, maar ook aan die mense daaragter se toewyding, die verhoudings wat hulle bou en die maatskappy se sterk familiegees.