AgriSA is trots om die 30ste Konferensie van die Partye (COP30) in Belém, Brasilië, by te woon en sy lede daar te verteenwoordig.

Hierdie wêreldwye byeenkoms kom op ‘n kritieke tydstip vir die landbou, aangesien produsente regoor die wêreld die toenemende impak van klimaatsverandering, verskuiwende handelsvereistes en stygende verwagtinge vir volhoubaarheid oor waardekettings heen moet hanteer.

Klimaatsverandering: ‘n Daaglikse werklikheid vir Suid-Afrikaanse boere

Op grond van insigte uit die onlangse AgriSA Atlas-kongres en die werklike ervarings van boere regoor die land, beklemtoon AgriSA dat klimaatsverandering nie meer ‘n toekomstige risiko is nie, maar dat die gevolge daarvan reeds Suid-Afrika se landboulandskap hervorm. Erge weersomstandighede, langdurige droogtes, biosekuriteitsbedreigings en wisselvallige produksietoestande het bepalende kenmerke van Suid-Afrikaanse boerdery geword.

‘n Waardeketting wat mobiliseer vir volhoubaarheid

“Boere en die waardeketting is grootliks verenig in hul ervaring: die klimaat is besig om te verander, en die impak daarvan is werklik, meetbaar en verskerp. Tog maak Suid-Afrikaanse produsente reeds beduidende vordering in die strewe om die uitwerking deur ‘n reeks volhoubaarheidspraktyke aan te pas en te versag,” sê Johann Kotzé, AgriSA se hoof- uitvoerende beampte.

Dit is duidelik uit deurlopende pogings regoor die waardeketting:

•Saad- en biotegnologie-innovasies wat klimaatbestande kultivars moontlik maak.
•Oplossings vir skoner kunsmis en gewasvoeding.
•Energiedoeltreffende masjinerie en presisielandbou.
•Laer-emissie- logistieke stelsels, kouekettingverbeterings en slim roetering.
•Volhoubaarheidstandaarde in produksie, verwerking, verpakking en kleinhandel.

“Dit is duidelik dat die hele voedselstelsel saamstaan om emissies te verminder, veerkragtigheid te versterk en aan die groeiende volhoubaarheidsvereistes van wêreldmarkte te voldoen, terwyl voedselsekerheid gehandhaaf word,” sê Kotzé.

Klimaatbeleid en -handel: Beskerming van SA se marktoegang

Klimaatbeleid bepaal toenemend wêreldhandel. Instrumente soos die EU se koolstofgrens-aanpassingsmeganisme en opkomende klimaatverwante markstandaarde word vinnig determinante van uitvoermededingendheid.

“Suid-Afrika, ‘n netto uitvoerder van produkte, moet verseker dat klimaatsverpligtinge, koolstofrekenkundige raamwerke en bemagtigende beleide toegang tot belangrike premiemarkte beskerm terwyl nuwes ontvou,” sê Kotzé.

AgriSA merk in sy onlangse kommentaar op die Tweede Konsep- Nasionaal Bepaalde Bydrae (die “konsep-NDC”) ingevolge die Parys-ooreenkoms op dat die regering vordering gemaak het met die versterking van nasionale klimaatsverpligtinge, maar beklemtoon dat implementering wetenskap-gegrond, ekonomies realisties en in ooreenstemming met voedselsekerheids-vereistes moet wees.

‘n Geloofwaardige klimaatbeleidspad:

•Ondersteun produsente om klimaatslim tegnologieë aan te neem.
•Erken landbou se beperkte korttermynversagtingshefbome.
•Belyn aanpassingsplanne met waterbestuur, besproeiingsbelegging en vroeë waarskuwing-stelsels.
•Verskaf duidelikheid oor koolstofmeting, verslagdoening en sertifisering om internasionale markvertroue te verseker.

Innovasie in die private sektor sal aanpassing dryf

Aanpassing regoor die landbou-ekonomie sal grootliks gelei word deur innovasie in die private sektor, veral in versekering, finansies en tegnologie. Suid-Afrika sien reeds:

•Geïndekseerde versekeringsprodukte.
•Risiko-aangepaste finansiering vir veerkragtigheidsbeleggings.
•Nuwe dataplatforms, afstandswaarnemingsinstrumente en klimaat-intelligensiestelsels.
•Geïntegreerde veerkragtigheidsoplossings vir gewasse, vee, infrastruktuur en watergebruik.

“Hierdie ontwikkelings wys dat die sektor terselfdertyd veerkragtigheid kan versterk, emissie-intensiteit kan verminder en landelike ontwikkeling kan dryf,” sê Kotzé.

‘n Verbintenis tot samewerking

AgriSA erken die dringendheid van wêreldwye klimaat-aksie en bly ‘n konstruktiewe vennoot in die vorming van Suid-Afrika se nasionale klimaatverpligtinge. Namate die land sy klimaatbeleid verfyn en sy rol in globale markte onderhandel, moet die landbousektor sinvol ingesluit, ondersteun en bemagtig word om op te tree.

“Suid-Afrikaanse boere is aan die voorpunt van klimaatsverandering. Ten spyte van sy uitdagings gaan landbou voort om te innoveer, te belê en aan te pas. Saam met die wêreldwye landbouwaardeketting is ons rol by COP30 om te verseker dat die stem van die produsent en die voortgesette pogings van die hele waardeketting in globale klimaatbeleide erken word,” sê Kotzé.