Tyd is geld en Footprint Performance se sagteware kan jou help om albei te bespaar. Die sagteware kan jou trekker of stroper tussen 10% en 30% meer krag gee en dit alles teen veel minder as wat ‘n nuwer, groter werktuig  jou sou kos.

Wat doen Footprint Performance?

Jaco Dippenaar, eienaar van Footprint Performance, vertel dat hy sy onderneming se deure in 2011 geopen het. Hy het eers ‘n inpropeenheid (‘plug and play’) ingevoer om motorkarre se werkverrigting te verbeter.

“Gou het ek agtergekom dat die motormark versadig is, en ek moes aan ander idees begin dink,” vertel hy.

Dit is toe dat hy eendag ‘n oproep van ‘n boer in Bothaville af ontvang het om te vra of die tegnologie op trekkers ook toegepas kan word.

“Hy het my oortuig om vir hom ook so ’n inpropeenheid in te voer vir sy John Deere-trekker. Ek het na hierdie installasie besef dat daar ‘n mark is om landboutoerusting se kraglewering te verbeter.”

Volgens Jaco is Footprint Performance se stelsels voordelig omdat verskaffers dieselfde enjin en ratkas in ‘n reeks stropers en trekkers gebruik, en slegs deur die sagteware te verander meer krag lewer.

“Dit is dus baie veilig en kostedoeltreffend om eerder dit te doen as om R35 000 per kilowatt te betaal vir ‘n nuwer trekker.”

Jaco het sy huiswerk gaan doen

Eers moes Jaco meer gaan uitvind het oor die konsep, sy vaardighede opskerp en sy kennis verbreed. Hiervoor het hy kursusse in Duitsland en Nieu-Seeland gaan voltooi.

“Al is die konsep dieselfde, is die toepassing en sagteware heeltemal anders, en om te sê jy kan ‘n trekker opgradeer net omdat jy motors kan doen, is ongelukkig nie korrek nie.”

Dit het ure, dae en weke se toetse op verskillende toerusting geneem om dit reg te kry en terselfdertyd te verseker jy beskadig nie die toerusting nie.

“Daar is steeds, na meer as 11 jaar, dae wat ek nuwe dinge leer om toerusting, met klein veranderinge aan sagteware, korrek te kan verrig sodra die verskaffer iets verander.”

Voordele van die sagteware

Die grootste voordeel wat die sagteware vir boere inhou wanneer dit by verbetering van kraglewering kom, is die kostebesparing.

‘n Nuwe trekker met meer kraglewering in dieselfde reeks kan jou maklik R2-miljoen uit die sak jaag. Jaco sê dat hierdie koste onmiddellik bespaar kan word deur op ‘n veilige manier die krag van jou huidige trekker op te gradeer sodat hy dieselfde krag het as die model net bo hom.

“Dan is daar ook tydbesparing. Met beter kraglewering kan bykans in alle gevalle twee ratte hoër gewerk word as tevore, wat ook dan minstens 3 tot 5 km per uur vinniger is indien dit verlang word … of minstens een rat hoër, maar teen laer omwentelinge wat die enjinlading met minstens 40 tot 50% verminder.”

Die meeste enjins met elektroniese beheer en turbo-aanjaers kan opgradeer word. Volgens Jaco kan ouer modelle soms problematies wees omdat hulle dalk reeds meganiese slytasie en onderliggende probleme het, maar dit is darem nie altyd die geval nie.

Hoe werk dit?

Om hierdie proses reg te kry, maak Jaco eers ‘n afskrif van die toerusting se standaard-sagteware; hy berg dit en maak dan veranderinge op ‘n nuwe lêer. Die nuwe lêer se sagteware met die veranderinge word dan opgelaai.

“Daar is kostes daaraan verbonde om die korrekte, geregistreerde toerusting te gebruik wat korrek gelisensieer is, asook om elke lêer te verander na ‘n formaat wat verstaan kan word en waaraan veranderinge aangebring kan word. Daar word ook gereeld nuwe kabels benodig wat die nuutste toerusting kan lees.”

Hoe meet jy jou kostebesparing?

Jaco verduidelik dat die kostebesparing met die gebruik van sy sagteware op verskeie maniere gemeet kan word:

• Die boer hoef nie nuwer trekker of stroper te koop nie, maar kan slegs die kraglewering opgradeer
• Die boer kan werk vinniger voltooi
• Brandstofbesparing
• Besparing aan dienskostes met verwydering van problematiese uitlaatbeheerstelsels soos hersirkulasie van uitlaatgasse (EGR), ‘n dieselfilter (DPF) en dieseluitlaatvloeistof (DEF)

Watter tipe landboutoerusting kan opgegradeer word?

Jaco kan die volgende dienste lewer op Vlak drie tot vyf trekker- en stroperenjins:

• Kragleweringverbetering (10% tot 30% afhangend van wat veilig is volgens toetse)
• Uitlaatbeheerverwydering
• John Deere- of Claas-trekkers se VGT (veranderlike geometrie-turbo) kan verander word na ‘n ‘Actuator Turbo’ (aandrywerturbo).

“Ek het die toerusting om die meeste voertuie te kan opgradeer, maar verkies om my moeite op landboutoerusting te fokus omdat dit my liefde en belangstelling is.”

Indien jy meer te wete wil kom oor hoe jy jou trekker se krag kan vermeerder, kan jy die Footprint Performance-webtuiste besoek by https://www.footprintperformance.co.za/. Jy kan ook die Facebook- en Instagram-blaaie besoek of vir Jaco kontak by (+27) 83-675-8364.