Wolpryse het oor die afgelope jaar mooi gestyg en skaapboere kan nie kla oor die pryse wat by die laaste veiling vir die 2014/2015-seisoen behaal is nie.

Op die 33ste wolveiling van hierdie seisoen het die Cape Wools Merinowolmarkaanwyser met 0,9% gestyg en op 14120c per kg skoonwol gesluit. Dit is ongeveer 25,06% hoër as ‘n jaar gelede.

Gemiddelde skoonwolprysaanwysers vir goeie gehalte lang vagwol (MF4/MF5) met ‘n treksterkte van 35 (NKT) was soos volg:

18 µ    15238 (+1,7%)                                 

19 µ    14690 (+3,2%)                                 

20 µ    14057 (-0,4%)

21 µ    13932 (+2,%)

22 µ    13576 (+0,5%)                                                         

23 µ    13039 (+1,1%)

Die grootste kopers op die veiling was Lempriere South Africa (3,848 bale), Standard Wool (3,589 bale) en G Modiano (1,553 bale). Van die 9,838 bale wat aangebied is, is 9,715 bale verkoop (98%).

Die drie hoogste pryse wat op die BKB-veiling behaal is, is betaal aan CH Wagenaar van Jamestown vir ’n vetprys van R119,00 per kilogram; Karoo-Lelie Landgoed Bk by Cradock vir vetprys van R117,10 en Lovedale Family Trust by Klipplaat vir ’n vetprys van R115,10.

BKB is baie tevrede met die suksesvolle 2014/2015-wolseisoen en het hulle kliënte gelukgewens met hulle prestasies. Die openingsveiling vir die nuwe seisoen; katalogus P0115, sal op 12 Augustus 2015 plaasvind.