Hyundai in Suid-Afrika het maar ‘n opdraande pad gery om te kom waar dit vandag as een van Suid-Afrika se mees suksesvolle motorvervaardigers gereken word. Hier rondom die jaar 2000 was Hyundai se vorige verspreiders in SA bankrot, handelaars moes hul deure sluit en eienaars was gestrand sonder dienspunte en onderdele. Toe die Imperial groep later ingryp om die Koreaanse handelsnaam weer in SA te laat herleef, was verkope die figuurlike  druppels in ‘n emmer met Hyundai se reputasie aan skerwe en nuwe kliënte kopsku. ‘n Hyundai produk in SA was daardie tyd omtrent so gewild soos ‘n Gupta vandag by ‘n EFF vergadering.

Toe kom die klein Getz.  Goed toegerus met ‘n moderne voorkoms en ‘n markleidende 5 jaar of 150,000km waarborg, was die klein buksiemotor die spreekwoordelike Moses om Hyundai uit die SA motorwoestyn te lei.

Nie lank daarna in 2005 het Hyundai SA die Tucson (toe in sy tweede generasie) in Suid-Afrika gedebuteer. Die mediumgrootte sportsnuts se gewildheid het selfs vir Hyundai SA onkant betrap en as die klein Getz die Moses was wat die handelsnaam uit die droë woestyn uitgelei het, kan die Tucson met die Bybelse Josua vergelyk word wat Hyundai op die pad na melk en heuning geplaas het. Sedert sy bekendstelling in 2005 totdat die model in 2010 uitgefaseer is,  het 22,716 Tucsons in Suid-Afrika verkoop wat die model loshande die segmentleier van sy tyd gemaak het.

Die ringkoppe in Korea het egter besluit om die Tucsan naam te bêre en in 2009 is die nuwe Hyundai iX35 in SA geloods. Die “Fluidic Sculpture” ontwerp het geblyk net so gewild te wees en het voortgebou op die gewildheid van die handelsnaam in Suid-Afrika.

So pas het Hyundai die volgende generasie Tucson teen die hange van ou Tafelberg bekendgestel en ons was daar. Met ‘n  moderne  voorkoms en ‘n turboaangejaagde petrolenjin wat by die Hyundai Veloster geleen is, wil Hyundai SA die volgende hoofstuk van sy suksesverhaal in Afrika se suidpunt skryf.

Voorkoms en Ontwerp

Die 2016 Tucson deel ‘n platform met die nuwe Kia Sportage wat die wielbasis 30 mm gerek het om die bak 65 mm langer en 30 mm breër as die iX35 te maak.

Van buite lyk die nuwe model na ‘n kleiner Santa Fé en onder leiding van Peter Schreyer, Hyundai se hoof ontwerper, is die Tucson ‘n visuele kragtoer. Die Tucson hurk oor groot wiele wat die voertuig hoog laat staan, terwyl die groot wielboë onder uitgeboude flanke wat saam met die lang kant- en daklyn wat na agter swiep, aggressie en sportiwiteit tot die voorkoms voeg. Die neus is prominent en dra nou, anders as die iX35, die Santa Fé se groot heksagonale sierrooster en LED ligte. Agter sorg nuwe ligte, twee uitlaatpype en die heuplyn bokant die buffer vir ‘n treffende voorkoms.

Binneruim en Toerusting

Voorkoms, uitleg, afwerking en materiale in die kajuit het beïndruk. Die binneruim voel en vertoon duursaam en luuks met harde plastiekafwerking grootliks afwesig. Tydens bekendstelling het ons die AWD model  bestuur in luukse Elite afwerking. ‘n Groot  glasdak en die R15,000-00 opsionele ekstra vertoon- en raakskerm  met die nuwe generasie navigasie het bygedra tot die ervaring van luuksheid in die Tucson. Die voorpaneel, instrumentehuls asook die sentrale konsole is intuïtief uitgelê met die skakelaars en beheerskakelaars wat ergonomies goed  geplaas is. Afwerking in swart en dowwe aluminium het duursaam vertoon en gevoel.  Digitale klank/radio stelsel met ses luidsprekers is standaard.

Die 2016 Tucson het ‘n 5-stêr Euro NCAP veiligheidsgradering behaal en kom standaard met ses lugsakke en ‘n nuwe bakstruktuur wat uit 51% gevorderde hoë-sterkte staal vervaardig is, asook veiligheidsfunksies soos ondermeer blindekol sensors en ‘n stelsel wat die voertuig stabiliseer wanneer van bane verwissel word.

Enjin en verrigting

Die viersilinder 1,6 liter turbo petrolenjin  lewer 130kW se piekkrag en 265Nm wringkrag. Dit is dieselfde kragbron soos in die Veloster turbo en maak sy toetrede plaaslik in ‘n Hyundai  SUV met beide voorwielaandrywing en AWD  opsies beskikbaar. Standaard is egter voorwielaandrywing deur Hyundai se eie 6-spoed handratkas en wat ‘n heerlike ratkas is dit nie. Glad, soepel met lekker kort skuiwe is dit na Honda sekerlik die beste in die segment. Hyundai se 7-spoed dubbelkoppelaar ratkas is opsioneel beskikbaar maar kom standaard met die AWD Elite topmodel .

Hyundai sê brandstofverbruik is 8.3 liters/100km vir die voorwielaangedrewe 1.6L handrat en 8.5 liters/100km vir die AWD Elite model, terwyl die skadelike uitlaatsyfers aangegee word as 169g/km en 178g/km onderskeidelik.

‘n  2.0 liter petrolenjin model sonder turboaanjaging kom ook en lewer  115kW/196Nm, maar is slegs beskikbaar in die ‘Premium’ afwerkingspesifikasie met die keuse van ‘n 6-spoed handratkas of 6-spoed outomaties. Amptelike brandstofverbruik word aangegee as 8.9 liters/100km vir die handratkas

 9 liters/100km vir die outokas met CO₂  uitlate as 186g/km en 204g/km onderskeidelik.

Hyundai het 5 modelle  in drie verskillende afwerkingspesifikasies met twee enjin opsies beskikbaar gestel. Die 2.0l enjin modelle is beskikbaar in drie weergawes, twee met intreevlak “Premium” afwerking  in handrat of outomaties, en dan ‘n luukser “Elite” weergawe wat slegs in outomaties te koop sal wees.

Modelle toegerus met die 1,6 liter turbo-enjin is verkrygbaar in die “Executive” afwerking en slegs met handrat terwyl die topmodel “Elite” verkrygbaar is met AWD en die 7-spoed DCT ratkas.

Op die pad

Die nuwe Tucson se ritgehalte en padgedrag is merkbaar beter as die uitgaande iX35 model.  

Goeie hantering en paddinamika het opgeval met relatief min bakrol as jy deur die draaie sool. Ons het tydens die bekendstellingsrit deur die Swartland en Boland ook stowwerige grondpaaie verken en die onderstel en veerstelsel het opnuut beïndruk met ‘n goeie balans tussen sportiwiteit en gemak, grootliks te danke aan die McPherson stutte voor en die veelskakelveerstelsel met springe en teenrolstaaf agter. Die stuurgevoel en terugvoer het vertroue ingeboesem selfs deur die draaie op die grondpad, terwyl gasgevulde skokabsorbeerders die sinkplaatgedeeltes heerlik gedemp het ten spyte van die groot 245/45 R19 wiele.

Slotsom

Die 2016 Hyundai  Tucson ding mee met  ondermeer die Ford Kuga, Kia Sportage, Mazda CX-5,  Mitsubishi ASX,  Honda CR-V en Toyota RAV en is na my mening tans die mooiste SUV  van die lot met bougehalte wat  volgens my ‘n nuwe standaard vir hierdie segment stel. Ek wil my verstout om te sê dat indien die Tucson se identiteit verbloem kon gewees het, meeste van ons by die bekendstelling sou gedink het dit is van die beter produkte uit Duitsland.   

Die nuwe Tucson is ‘n pragtig gestileerde, goed toegeruste SUV met uitstekende bougehalte wat ‘n heerlik gemaklike rit aan 5 insittendes bied. Is die nuwe Tucson dalk die Dawid wat Hyundai nodig het om die Goliats in die mark mee uit te kikker? Ek dink so. 

Verkooppryse

Hyundai Tucson 2.0 Nu Premium (Handrat) – R359 900
Hyundai Tucson 2.0 Nu Premium (Outomaties) – R379 900
Hyundai Tucson 2.0 Nu Elite (Outomaties) – R439 900
Hyundai Tucson 1.6 TGDi Executive (Handrat) – R419 900
Hyundai Tucson 1.6 TGDi Elite DCT AWD – R499 900

Hyundai se 5jr/150 000 km vervaardiger
s waarborg asook ‘n markleidende verdere 7jaar/ 200 000 km waarborg op die aandryfstelsel, is standaard, asook ‘n 5jaar/90 000 km diensplan met 15 000km diens siklusse.

Artikel geskryf deur Dirk Gallowitz