Categories: NewsPublished On: 23rd January 2012

Waterwese-wil-sê-hê-oor-myne

By 2 min read

Nog ‘n staatsdepartement het tot die geskil oor mynlisensies in die Grondwethof  toegetree. Die department van waterwese en omgewingsake maak ook aanspraak op die toekenning van mynlisensies.

Die geveg in die Grondwethof is tot op hede tussen die minister van minerale hulpbronne en verskeie provinsiale regerings gevoer.

Volgens me Edna Molewa, minister van Waterwese en Omgewingsake, se betooghoofde aan hoofregter Mogoeng Mogoeng behoort háár departement die laaste sê te hê.

Me Susan Shabangu, minister van Minerale Hulpbronne, se argument is dat provinsiale regerings moet aanvaar wanneer sy mynlisensies toeken en dat hulle onmiddellik moet toelaat dat mynbedrywighede voortgaan.

Die Wes-Kaapse regering voer aan dat dié provinsie se Ordonnansie op Grondgebruiksbeplanning (Lupo) bepaal dat die provinsie die laaste sê het oor die gebruik van grond in die provinsie, al het die minister ’n mynlisensie toegestaan. Die Wes-Kaap is nie die uitsondering nie aangesien verskeie ander provinsies ook soortgelyke ordonnansies het.

Verlede week het die Kamer van Mynwese as vriend van die hof toegetree tot die regsdebat. Die appèlhof het reeds in twee gevalle beslis dat die provinsies die finale sê het oor mynlisensies vanweë Lupo en soortgelyke ordonnansies in ander provinsies.

Me Molewa het egter dinge nou omver gewerp deur aan te voer dat háár departement ingevolge die Wet op Nasionale Omgewingsbestuur (Nema) eintlik die laaste sê het of mynbedrywighede mag voortgaan.

Volgens haar is die omgewingsimpakstudie wat me Shabangu vereis voordat sy ’n mynlisensie goedkeur, baie oppervlakkig en voldoen nie naastenby aan die omvattende vereistes van Nema nie.

Haar argument is dat die staat’n grondwetlike plig het om aan elkeen in Suid-Afrika ’n “gesonde omgewing” te waarborg.

Die hof hoor volgende maand mondelinge betoog aan.

 

Bron: Beeld

 

0

Deel hierdie artikel.

Leave A Comment

0