Vrystaat Landbou (VL) het met skok en ongemak kennis geneem van ʼn drastiese verhoging van SASRIA tariewe op sekere voertuie wat op 1 Februarie 2022 in werking gaan tree.

Die verhoogde tariewe is by wyse van ʼn skrywe aan SASRIA se agente en tussengangers gekommunikeer gedurende September en Oktober 2021 en kan ʼn geweldige aanpassing meebring aan die SASRIA-tariewe van toepassing op trekkers, stropers, self aangedrewe spuite, planters ensovoorts wat in die landbousektor gebruik word. Dié drastiese verhoging
is volgens die kennisgewing van toepassing op HCV geklassifiseerde voertuie (swaar kommersiële voertuie) soos vragmotors wat vir kommersiële vragvervoer teen vergoeding gebruik word.

Francois Wilken, president van VL, meen die aanpassing kan moontlik toegeskryf word aan die geweldige skade wat aan vragmotors aangerig is tydens die oproer in Kwazulu-Natal gedurende Julie 2021. “Die landbousektor, wat alreeds veral in die Vrystaat aan wesenlike
ekonomiese uitdagings blootgestel is, sal eenvoudig nie die tariewe kan bekostig nie!”

Voorbeelde van die aanpassings wat aan VL voorsien is, as volg:

TIPE	BEDRAG VERSEKER	2021 SASRIA PREMIE	2022 SASRIA PREMIE	% VERHOGING
TREKKER	R2 800 000	R52.61	R966.17	1736%
TREKKER	R4 270 000	R80.18	R1472.37	1736%
TREKKER	R450 000	R8.46	R155.28	1735%
STROPER	R4700 000	R87.88	R1613.86	1736%
SELF AANGEDREWE SPUIT	R4 200 000	R78.91	R1469.93	1762%
PLANTER	R1 600 000	R30.06	R552.10	1736%
PLAASVRAGMOTOR	R900 000	R16.91	R310.55	1736%

Bron: Vrystaat Landbou